Zunnewendefestival 28 en 30 juni 2024

ZUNNEWENDE

-Oh, wenn die Sonne ...
-O when the sun...
-Quand le soleil ...
HELIOS HEUILEMAOL

Vanaovend -
wij reden aachter een bussie
dat Volkswaogenbussie
tot dat ofsleuig
het sleuig of
wij waden d'r sneu van ...

-Oh, wenn die Sonne ...

en ja, die is d'r
en mèensen bint d'r
en wolken ok
en dat grös
en dat waoter

-O when the sun ...

die as jazz lat strunen
die as oren op luustern zet
die as "nog maor een pilsie"
of "een wientie"
die as zèeggen lat:
"Goeienaovend!"

HELIOS HEUILEMAOL

klaanken en woorden
drieft deur een spraokeloze
locht en wod opvaangen
deur wel luustern wil en
kan en duurt
hier in de zun
umgeven deur zun
under de zun

ZunneWende

op de baankies bij 't vuur
waor 't zingt oet
Grunn, de Aachterhoouk
en Drenthe
waor de aodem
waor de klaore aodem
waor de kaant en klaore aodem
oous metnemp en weergef
en de zun undertussen
de zun luustert en fluustert

-Oh, wenn die Sonne ...

op het grote podium
zingt zuch de aovend naor mörgen
waor de herinnerings openbluijt

HELIOS HEUILEMAOL

Hutten Klaos en Johanna
bint in gien vèelden of wegen
te bekennen -
ze bint oet de tied
en wij, wij zit d'r middenin
in de zun en de maon komt d'r an

-Oh, ZunneWende ...
-O when the sun ...
-Quand le soleil ...

en de zun went wel
de zun komp d'r an
de zun zal blieven
welkse wending ok

HELIOS HEUILEMAOL

Zunneman
Maoneman
Zunneman
Maoneman

Zunneman
Maoneman

© Egbert Hovenkamp II