(TerPlekkePoeem schreven en oetspreuken tiedens het ZunnewendeFestival, 24 juni 2023, Hellendoorn. N.B. hier en daor tiedens 't rikketikken een paor kleine wiezegings):

 

FEDUSIE

(Tiedgeest over de kop)

 

Laow van mekaor holden

in dizze tied

vol splieten   splitsen

en vingerwiezen

waant wat is der mis met

leeifde   vrede   begrip?

laow van menare holden

laow zunne wende maoken

met meziek der bij

met woorden der bij

met de zunne der bij

met mekaor der bij

saomen op dizze plek waor:

de zangeres zingt dat ze vrij is

in dizze wereld

met hobbels en bobbels

strukel maor niet

gao maor naor de vleermoezenbult

-een wereld in een wereld-

gewoon z i t t e n

gebeuren laoten gebeuren

het l u u s t e r n

het r o e k e n

-van een wereld in een wereld-

waor wij van menare kunt holden

en waorumme niet?

wat is der op tegen?

wat is der mis met

leeifde   vrede   begrip?

wat wieder weg heur ik meziek

die stoort niet

die heurt hier

vandaog de dag

met aal dat volk

wij almaol saomen

zeei wel: het kan   het is zo

zoas 't vlakbij 't waoter

klinkt en huppelt

daanst en angeeit -

de meziek döt dat almaol

meziek waor aj bliede van wodt

meziek die as je lat kieken

vol leeifde naor 't laand

waor verhaolen hoest

in de grond   in de hoezen

waor ok mèensen van mekaor hold

en ok van meziek

levende mèensen meziek

hier an't waoter

een èendtie wieder

staot tweei breurs

de sterren an de heeimel te zingen

alvaast veur dommiet, veur temet

as 't duuster is

de lochies de tover laot zeein

waorin wieluu van menare hold

zunder gegraans of venien

gewoon: mèensen saomen tiedens de Zunnewende

waor nou de zangeres van zuch lat heuren

met die tovermooie stem

stil woj der van

laot 't binnen kommen

en laot je raoken

waor aj openstaot

van waoroet wij van mekaor kunt holden

umgeven deur meziek

in de taol waor aj van kunt holden

zoas de zaanger van staol dat döt

een taol die aj oet kunt spreken

um mekaor an te spreken:

ik hol van je

zoaj bint en ik steun oe zunder veurwaorden in aal je kraacht, grootsheid en meer danj veur meugelk holdt

ales is meugelk

umdaj mèens bint

in een z u n n e c i r k e l van locht

zo binnen zo boeten

zo binnen zo boeten

zo binnen zo boeten

zo binnen zo boeten

zo binnen zo boeten

zo binnen zo boeten

zo binnen zo boeten

 

 

(in elks geval veur Ilona)

 

© Egbert Hovenkamp II