Het Festival (streektaal)

 

Springleavend streektaalfestival Zunnewende viert ’n langsten dag

 Vriedag 23 juni is der veur ’t elfde moal ‘t streektaalfestival Zunnewende.  Um 16.00 uur geet ‘t los op landgoed Schuilenburg, pal nöast de Regge in ‘t boetengebied van Heldern. De earste paar uur bint veur de jungen. En noa ’t etten, woarveur ieleu good terecht könt bie de foodtrucks op ’t festivalterrein wördt vanof 20.00 uur de podiums en annere spölplekken innömmen deur allerhaand verhalenvertellers, zangers en muzikanten in verschillende sproaken.

 Biezunder dit joar is de multimediale earfgoodshow Vooruitboeren direct an de kaant van de Regge met verhalen, films, foto’s en leedkes in de streektaal. ’t Geet oaver de veraanderingen in de tied tusken 1950 – 2000 op ’t plattelaand van Oaveriessel. Weemood, verbazing mer ok greuts bint de begrippen van dizze biezundere show woar ‘t weark van historici en artiesten wördt combineerd. Net as veurig joar schildert op ‘n  Vleermoesbult Erik Schutte in de streektaal.

 Veur alman wat op de podiums

Op ‘t hoofdpodium gif ‘t achtermekaar singer-songwriter en Broabander J.W. Roy, ’t Vrolijke Twentse Dokter Watjes, wearldverbetteraar, geveulsmens, cabaretière en columniste Nathalie Baartman. Juust, de bekeande meziekband oet  Genemuden hef veur de finale verstearking regeld van ne echte bloazersgroep en ’n stuk of wat achtergrondzangers en -zangeressen. Soul op zien Juust.   

Dorothe Spijker ‘Mag ik dan bie oe’ oet Hulsen döt ’t  joarlijkse Zunnewendegedicht en treedt tehoop met Sweet ’N Spicy ’n moal of wat op oonder ‘n kastanjeboam. ‘t Reggepodium is 23 juni reserveerd veur Handy Joe en de Boogie Kearls. Plat, noar veurbeeld van ZZ Top, Stevie Ray Vaughan, en Jimi Hendrix.

 De Drentse Margaretha Kleine deelt met Goningers Jan Henk de Groot en Harry Niehof de spölplek oonder an ’n Vleermoezenbult. Dree singer-songwriters met allemoal nen eagen stiel en eagen sproak. Origineel, herkenbaar en allemoal veur zich wearldberoemd in Noord Nederland en wiederop.

 In ‘n appelhof zit of steet, zoas de organisatie zeg ‘oonzen eagen’ Herman Kampman. Hee hef veur dizze Zunnewende ‘n niej programma met anstekkelijke verhalen en humoristische gedichten maakt, woarin völ leu zichzölf zölt herkennen.

 In de wagenschuur kan ‘t volk ’n moal of wat loestern noar ‘t sagenmysterie, woarin bezeukers de verzunnen, gedachte en misschien wa ’t echte verhaal van ‘t onwiese Twentse plattelaand wördt verteld. En wel terug wil noar ‘n  80-joarigen oorlog, zoas den zich in dizze strekken hef ofspöld, stapt in op één van de dree boten en beleaft dizze geschiedenis vanof ‘t water van de Regge.

 Ontmeutingsfeest veur alle leaftieden

‘t Zunnewende festival wördt al joar meer ne ontmeutingsstie veur ’n al grötter publiek. Zunnewende steet garant veur nen onmeundig mooien oavend, ok dit joar weer in ’n schier verlicht laandgood an de Regge. ‘n Oavend begeent zoas zegd al um 16.00 uur. Want dan bint der veer optredens speciaal veur keender. Fratelli Fiasco nemt alman met in ‘n  leavendig clownsspektakel. Anne van der Vegt zoch tehoop met de leu noar de reagenboog en met zus Lieke en wat dweargen oet ’t publiek döt ze ok Sneeuwwitje weer tot leaven brengen. De onhaandige goochelaar Hank goochelt in de streektaal op ne wieze dee nich te volgen is.